पाल्पा, असिना पानीको चुटाई बाट पाल्पाको पूर्वखोला गाउँपालिका ४ देवीनगरका एक व्यक्तिको ज्यान गएको छ । मंगलबार परेको असिना पानीले चुट्दा देबीनगर, तल्लो लेमधेमका ७३ वर्षिय बदल सिंह कुंवरको ज्यान गएको हो ।
कामको शिलशिलामा माईला छोरा घर बाहिर रहेको र उनी घर नफर्किए पछि खोज्न भन्दै मगलबार हुमिन पुगेका कुँवरको घर फर्कने क्रममा असिना पानीका कारण मृत्यु भएको वडा सदस्य भुवन सिंजालीले जानकारी दिए । छोरालाई भेटेर साँझ ५ः३० बजेर घर फर्किएका उनलाई देविनगरको दडुवा जंगलमा ओसिना पानीले चुट्दा ज्यान गएको वडा सदस्य सिंजालीले बताउनुभयो । ठूलो जंगल मात्र रहेको र कहीँ कतै पानी ओत्ने ठाउँ नभएपछि उनलाई पानी सहितको असिनाले चुटेको स्थानीयले बताएका छन् । उनलाई जंगलमा वरीपरी पानीले घेरेको अवस्थामा बुधबार विहान ८ बजेको समयमा स्थानीयले देखेका थिए । उनलाई पूर्वखोलाबाट तानसेन आउदै गरेको गाडीमा सवार केही स्थानीयले देखेपछि प्रहरीलाई खबर गरेका हुन् । खबर लगत्तै प्रहरी र जनप्रतिनिहरु घटनास्थल पुगेका थिए ।
उनको शव जिल्ला अस्पताल तानसेनमा पोष्ट मार्टम पश्चात परिवारले बुझेको जिल्ला प्रहरी कार्यालय पाल्पाले जनाएको छ । स्थानियहरुले ज्यान जानुको कारण असिनापानी भएको बताए पनि पोष्ट मार्टमको रिपोर्ट नआउन्जेल केही भन्न नसकिने प्रहरीले जनाएको छ ।
