विभिन्न देशका शहरका लागि विजयादशमीको टीकाको साइत सार्वजनिक

काठमाण्डाै, अन्तर्राष्ट्रिय पञ्चाङ्ग निर्णय समितिले यस वर्ष विजयादशमीको टीकाको साइत सार्वजनिक गरेको छ ।
समितिले विश्वका विभिन्न देशका शहरहरुको लागि टिकाको शुभसाईत सार्वजनिक गरेको हो ।                                                                                                                                    समितिको बैठकले नेपालको काठमाण्डाैका लागि कात्तिक १० गते (अक्टोबर २६) बिहान १० बजेर १९ मिनेटकाे साइत उत्तम रहेको जनाएको छ । यसैगरी भारतको दिल्लीमा बिहान १० बजेर ३५ मिनेट, अमेरिकाकाे न्युयोर्कमा अक्टोबर २५ (कात्तिक ९ गते) बिहान ११ बजेर ५ मिनेट, केन्टुकीमा बिहान ११ बजेर ७ मिनेट, टेक्सासमा बिहान ११ बजेर ५७ मिनेट र क्यालिफोर्नियामा ११ बजेर ४५ मिनेटकाे साइत दिइएको समितिका अध्यक्ष प्रा डा माधव भट्टराईले बताउनुभयो ।

यसैगरी बेलायतको लण्डनका लागि बिहान ११ बजेर ३९ मिनेट, क्यानडाको टोरन्टोका लागि बिहान ११ बजेर ४३ मिनेट, पोर्चुगलको लिस्बनका लागि बिहान ११ बजेर ३७ मिनेट र फ्रान्सको पेरिसका लागि बिहान ११ बजेर ४१ मिनेटमा विजयादशमीको टीका लगाउनु शुभ रहेको समितिले जनाएको छ । यी शहरमा पनि अक्टोबर २५ तारिखका दिन विजयादशमी पर्व मनाइन्छ ।

जापानको टोकियोमा अक्टोबर २६ तारिखका दिन बिहान ११ बजेर ३५ मिनेट, अष्ट्रेलियाको सिड्नीमा बिहान ९ बजेर ४३ मिनेट, अष्ट्रेलियाकै मेलबर्न शहरमा बिहान ९ बजेर ५३ मिनेट, अष्ट्रेलियाकै ब्रिसबेनमा बिहान ९ बजेर ५१ मिनेट, मलेसियाको क्वालालम्पुरमा बिहान १० बजेर ३५ मिनेट, संयुक्त अरब इमिरेट्सको अबुधाबीमा बिहान १० बजेर ४३ मिनेट, कतारको दोहामा बिहान १० बजेर २१ मिनेट, थाइल्याण्डको बैङ्ककमा बिहान १० बजेर ३३ मिनेट, दक्षिण कोरियाको सोलमा बिहान १० बजेर २७ मिनेट, इजरायलको तेल अभिभमा बिहान १० बजेर ३७ मिनेट, सिङ्गापुरमा बिहान १० बजेर ४१ मिनेट, हङकङमा बिहान १० बजेर ४९ मिनेट, साउदी अरबमा बिहान १० बजेर २५ मिनेट र न्युजिल्याण्डको वेलिङ्टनमा बिहान १० बजेर १५ मिनेटकाे समयमा दशैँको टीका लगाउन उत्तम हुने जनाइएको छ ।

यी शहरमा पनि अक्टोबर २६ तारिखकै दिन विजयादशमी मनाउनुपर्ने समितिले जनाएको छ । विभिन्न देशमा फैलिएका नेपाली एवं वैदिक सनातन धर्मावलम्बीले दशैँको टीका लगाउन शुभसाइत माग्न थालेपछि समितिले ती देशका स्थानीय समयानुसार शुभ हुने बेलामा साइत दिइएको जनाएको छ । विश्व ज्योति महासङ्घले समिति गठन गरेको हो । नेपाल पञ्चाङ्ग निर्णायक समितिले यसअघि नै नेपालका लागि दशैँका विभिन्न साइत सार्वजनिक गरिसकेको छ ।

नेपाल पञ्चाङ्ग निर्णायक समितिले नेपालका लागि विजयादशमीलगायत दशैँका विभिन्न साइत सार्वजनिक गरिसकेको छ । विसं २०७७ कात्तिक १ गते शनिबारदेखि नेपालीको महान् चाड बडादशैँ सुरु हुँदैछ ।   घटस्थापनाको साइत कात्तिक १ गते शनिबार बिहान ११ः४६ बजे शुभ रहेको छ ।  दशैँको मुख्य दिन कात्तिक १० गते सोमबार विजयादशमी पर्व परेको छ । यस दिन बिहान नौ रात १० दिन पूजा गरिएको स्थलमा देवी विसर्जनका लागि बिहान १०ः११ बजेको साइत शुभ रहेको छ । विजयादशमीमा साइत नै खोजेर टीका लगाउनेका लागि भने बिहान १०ः१९ बजेको साइत उत्तम छ ।

चान्द्रमासअनुसार प्रत्येक वर्ष आश्विन शुक्ल प्रतिपदादेखि पूर्णिमासम्म १५ दिन मनाइने दुर्गा पक्ष अर्थात् बडादशैँ पर्व यस वर्ष अधिकमास अर्थात् मलमासका कारण कात्तिक १ गतेदेखि सुरु हुँदैछ । मलमासका कारण यस वर्षका अब आउने सबै चाडपर्व केही ढिला भएको छ ।

यो खबर पढेर तपाईलाई कस्तो महसुस भयो ?