पाल्पा, जापानीज नागरिक काजुमासा काकीमी (ओके बाजे) ले सवारी दुर्घटनाका घाईतेहरुको उपचारका लागि जुनतारा समाज निस्दी ५ गल्धालाई रकम सहयोग गरेको छ । जुनतारा समाजले सञ्चालन गरेको जिप दुर्घटनाका घाईतेहरुको उपचार खर्चका लागि १५ लाख रुपैयाँ सहयोग गरेको हो ।
गाउँ बाट सहयोग उठाएर तथा ऋण लिएर घाईतेहरुको उपचार गर्दै आएको जुनतारा समाजले खर्च बढ्दै गएका पछि विकल्पमा काठ काटेर रकम जुटाउने निष्कर्स पुगेको थियो । उपचार खर्चको लागि पूर्खाले जोगाएर राखेको देवताको थानको रुख काट्न लागेको थाहा पाए पछि ओके बाजेले जापानीज नागरिकहरु संग आवश्यक रकम जुटाएर सहयोग गरेको हो ।
निस्दी ५ का जनतालाई अत्यावश्यक यातायातको सहजताका लागि समाजले ओके बाजे कै सहयोगमा जिप सञ्चालन गर्दै आएको थियो । त्यस क्षेत्रका जनतालाई विरामी हुँदा होस् या अन्य अप्ठ्यारो पर्दा सेवा दिदै आएको लु १ ज २८८७ नम्बरको बोलेरो जिप गत साउन २७ गते साँझ निस्दी ५ पटकसारमा दुर्घटनामा परेको थियो । दुर्घटना हुँदा ३ महिने शिशु र ६३ वर्षिय पुरुषको घटनास्थल मै निधन भएको थियो । भने जिपमा सवार ६ जना घाईते भएका थिए । घाईते ५ जना उपचार पश्चात निको भएर घर फर्किए पनि १ जनाको भने अहिले सम्म उपचार भैरहेको छ । ३६ वर्षिय महिलाको भरतपुर मेडिकल कलेज चितवन हुँदै मेडिसिटी हस्पितल काठमाडौमा उपचार गरिएको थियो । स्पाईनल कदमा समस्या भएको उनको काठमाडौमा थेरापी भैरहेको छ ।
घाईतेहरुको उपचारमा हाल सम्म १८ लाख पैतालिस हजार भन्दा बढी खर्च भैसकेको जुनतारा समाजले जनाएको छ । स्थानिय संग ३ लाख सहयोग संकलन गरी बाँकी रकम ऋणमा खोजेर क्लवले उपचार गर्दै आएको थियो । जुनतारा समाजका पूर्व अध्यक्ष नुन बहादुर सारुले इन्स्योरेन्स बाट प्राप्त हुने उपचार वापतको रकम भन्दा बढी खर्च भए पछि समस्या भएको बताउनुभयो । उहाँले भन्नुभयो, ‘५ जना घाईतेहरु त निको भएर फर्किसकेको छ । १ जना महिला अझै अस्पताल मै हुनुहुन्छ । अहिले सम्म १८ लाख बढी खर्च भैसक्यो । अझै कति हुने हो टुङ्गो छैन ।’
सारुले उपचार खर्च जुटाउने कुनै विकल्प नभए पछि गाउँमा पुर्खाहरुले जोगाएर राखेको साल काट्ने निर्णय गरेको बताउनुभयो । उहाँले भन्नु भयो, ‘हामीले कुनै विकल्प नलागे पछि खर्च जुटाउन बाध्य भएर काठ काट्ने निर्णय गरेका थियौ । पछि ओके बाजेले रुख नकाट्नु यसको लागि म आवश्यक पहल गर्छु भन्नु भएपछि निर्णय बाट पछि हट्यौं ।’ जापानिज नागरिक समाजसेवी काजुमासा काकिमीले समाजका पदाधिकारीहरुलाई चेक हस्तान्तरण गर्दै पूर्खाले पुज्दै आएको रुख जोगाउनु हामी सबैको कर्तव्य भएको बताउनुभयो । उहाँले भन्नुभयो, ‘उहाँहरुले पुर्खादेखि पुजा गर्दै आएका स्थानका पुराना सालको रुखहरु काट्ने निर्णय गर्नु भएको रहेछ । यो खबर जापानीजहरु संग पु¥याएँ । सबैले प्रकृतिको संरक्षणमा चासो देखाउनु भयो । ५ सय जनाले सकेको सहयोग गर्नु भयो त्यही रकम हस्तान्तरण गरेको हुँ ।’ उहाँले क्लवले विगत देखि समाजमा गर्दै आएको कार्य निकै उदाहरणीय र प्रशंसनिय रहेको बताउनुभयो ।
जुनतारा समाजका अध्यक्ष तिल बहादुर बाह्रघरे गाउँमा परेको अप्ठ्यारोमा ओके बाजेले निरन्तर सहयोग गर्दै आउनु भएको बताउनुभयो । उहाँले दुर्घटनामा परेका गाडी निकालेर मर्मतको लागि पठाएको बताउँदै आगामी दिनमा पनि यातायात सेवा दिनका लागि समाज लागि परेको बताउनुभयो । 
