स्याङ्जा, स्याङ्जाको वालिङ नगरपालिका ११ मा सोमबार जिप दुर्घटना हुँदा १ जना घाईते भएका छन् । दिउँसो १२ बजे बायटारी सिर्सिकोट भित्र सडक खण्डमा सिर्सिकोटबाट वालिङ तर्फ आउँदै गरेको लु १ ज २५३६ नम्बरको जीप दुर्घटना हुँदा जिपमा सवार एक यात्रु घाईते भएका हुन् ।
घाईते हुनेमा वालिङ नगरपालिका ११ सिर्सिकोट छापा बस्ने ३४ वर्षीय बिजय गोतामे रहेको जिल्ला प्रहरी कार्यालय स्याङ्जाका प्रवक्ता प्रहरी नायव उपरीक्षक रबिन्द्र खनालले जानकारी दिनुभयो । जीप अनियन्त्रित भई सडक देखि ८ मिटर तल खसेको प्रहरी बताएको छ ।
गोतामेको टाउको र अनुहारमा चोट लागेको छ । उनको प्राथमिक स्वास्थ्य केन्द्र वालिङमा सामान्य उपचार पश्चात थप उपचारको लागि पोखरा रिपर गरिएको छ । जीपमा सवार अन्य यात्रुहरु सकुशल रहेका छन् । जीप चालकलाई प्रहरीले नियन्त्रण लिई घटनाको विषयमा अनुसन्धान गरिरहेको जनाएको छ ।
