पाल्पा, विहिबार तेस्रो रामपुर महोत्सव तथा व्यापार मेलामा दर्शकहरु आधुनिक गायक हिमाल सागर, लोकदोहोरी गायक शिव हमाल लगाएतका कलाकारहरु संगै रमेका छन् । अपरान्ह पख स्टेज चढेका कलाकारहरुको प्रस्तुतिमा छमछमि दर्शकहरुको हुटिङ्गले महोत्सव गुन्जायमान थियो भने मेला स्थलमा उफ्रीएका उनीहरुले धुलो उढाएका थिए ।
पछिल्लो समय चर्चामा रहेको आधुनिक गित ‘होर हो माया’ एल्बम बाट ‘बगेको खोली फर्किन्छु भन्छ । कालले नि केही बेर पर्खिन्छु भन्छ । तिमीलाई देखेर…’ भन्दै हिमाल सागरले प्रस्तुति राख्दा उनी संगै भाका हाल्दै महोत्सवमा आएकाहरु झुमेका थिए । १ हजार बढी गित गाईसकेका गायक हिमालले ‘कल्लाई थाहा छैन’, ‘ए मायाँ कहिले हो घर बसाउने’, ‘टिमिक्क साडी सिरबन्दी लाउँदा झन के होला’ लगाएका गित गाउनु भएको थियो ।
लोकदोहोरी गायक शिव हमालको दोहोरी भाकामा पनि माहोल निकै तातेको थियो । उनीहरु संगै लोकदोहोरी गायिका सकुन्तला गरै, कोपिला न्यौपाने, गायक घनश्याम रिजाल, रुपेश कार्की, लगायतको रमाइलो प्रस्तुती रहेको थियो । प्रस्तोताको रुपमा कल्पना रेग्मी रहनु भएको थियो ।
विहिबार पनि मेला स्थल रामतुलसी नमुना माविको खेल मैदान दर्शकहरुले भरिएको थियो । भलिबल, दोहोरी प्रतियोगिता, विद्यालय स्तरीय डान्स अाईडल, कृषि, घरेलु तथा कुटिर उद्योगका स्थल, बालउद्यान, होटल रेष्टुरेण्ट संगै राष्ट्रिय स्तरमा ख्याती प्राप्त कलाकारहरु संगै रम्नेहरुको भिडभाड रहेको थियो ।
शुक्रबार महोत्सवमा लोकगायक बद्रि पंगेनी, आधुनिक तथा गजल गायक राज सिग्देल, लोकदोहोरी गायिका सम्झना लामिछाने मगर,गायक राजन कार्की मोडल विमल अधिकारी अन्जली अधिकारी, लगायतको प्रस्तुती रहने आयोजकले जनाएको छ । कार्यक्रम प्रस्तोताको रुपमा ढाकाराम पौडेल रहनुहुनेछ ।
रामपुर उद्योग वाणिज्य संघको आयोजना र रामपुर नगरपालिकाको संरक्षणमा फागुन ८ सम्म सञ्चालन हुने मेलाको आकर्षणका रुपमा स्थानीय कृषि उत्पादनको प्रदर्शनी तथा विक्री सहितको ३ सय बढी स्टल, बाल उद्यान, हेलिकप्टर/प्याराग्लाइडिङ्ग बाट मनोरम दृश्य अवलोकन, कालीगण्डकीमा जलयात्रा (र्याफ्टिङ्ग), स्थानीय स्तरका मौलिक र स्वदिष्ट खाना सहितका २२ वटा होटेल तथा रेष्टुरेण्ट, जिल्ला स्तरिय भलिबल प्रतियोगिता रहेको छ ।
विहिबारको कार्यक्रममा प्रमुख अतिथी गुरु भट्टराई रहनुभएको थियो । स्याङ्जाको गल्याङ नगरपालिकाका प्रमुख गुरु प्रसाद भट्टराईले रामपुर उद्योग वाणिज्य संघले थालेको अभियानमा गल्याङ नगरपालिकाले पनि साथ दिने बताउनुभयो । कार्यक्रममा उपप्रमुख हेमा न्यौपाने सहित गल्याङ नगरपालिकाका प्रमुख प्रशासकिय अधिकृतको पनि उपस्थिति रहेको थियो । विहिबार १० हजार बढीले मेलाको अवलोकन गरेको रामपुर उद्योग वाणिज्य संघका अध्यक्ष भोजेन्द्र प्रकाश ढकालले जानकारी दिनुभयो ।
तस्वीरहरु : ॐ शान्ति डिजिटल स्टुडियोको फेसबुक पेज बाट
