रामपुर–३ लामटाङ स्थित जनविकास प्रा.वि.मा यस वर्ष विद्यार्थी भर्नादर शून्य


पाल्पा, रामपुर नगरपालिका–३ लामटाङ स्थित जनविकास प्राथमिक विद्यालयमा विद्यार्थी भर्नादर शून्य रहेको पाईएको छ । चालु शैक्षिक सत्रको लागि भर्ना सुरु भए देखि वैशाख २६ गतेसम्म एक जना विद्यार्थी पनि विद्यालयमा भर्ना नभएको पाइएको हो ।

विद्यालयमा स्थायी दरबन्दीमा एक, करार दरबन्दीमा एक शिक्षक र एक कार्यालय सहयोगी कार्यरत रहे पनि बसाइँसराइ सरेर अन्यत्र गएकाले गाउँमा बसेर पढ्ने विद्यार्थी नभए पछि भर्नादर शुन्य भएको हो । गत शैक्षिक सत्रमा कक्षा १ मा चार, कक्षा २ मा दुई, कक्षा ३ मा चार, कक्षा ४ मा एक, कक्षा ५ मा दुई गरी जम्मा १३ जना विद्यार्थी भर्ना भएको विद्यालयले जनाएको छ । विद्यार्थी भर्ना हुन आउने आश्वासन पाएर माथिल्लो निकायमा जानकारी नदिइएको तर शैक्षिकसत्र सुरु भएको महिनाको अन्तिमसम्म पनि विद्यार्थी भर्ना हुन कोही पनि नआएको प्रधानाध्यापक देवबहादुर ठाडाले बताउनुभयो ।

शैक्षिकसत्र सुरु भएको एक महिना पूरा हुन लाग्दा समेत विद्यालयमा एक जना पनि विद्यार्थी भर्ना नभएको खबर सुने लगत्तै रामपुर नगरपालिकाका प्रमुख रमणबहादुर थापा, उपप्रमुख बालकुमारी थापा, प्रमुख प्रशासकीय अधिकृत लेखनाथ न्यौपाने, शिक्षा अधिकृत विकल काफ्ले लगायतको टोलीले मंगलबार अनुगमन गर्नुभएको थियो । अनुगमनका क्रममा नगरप्रमुख थापाले विद्यालयमा पढ्ने विद्यार्थी नै नभएपछि तत्काल नजिकको पायक पर्ने स्थानको विद्यालयमा समायोजन गरेर सञ्चालन गर्ने बताउनुभयो । उहाँले भन्नुभयो, “जतिसक्दो चाँडो विद्यालय व्यवस्थापन समितिको बैठक बसेर अन्यत्र विद्यालय सामायोजन गर्न विद्यालयलाई ताकेता गरेको छु ।”

रामपुर नगर भित्र कम्तीमा २० विद्यार्थी संख्या भएको विद्यालयमा न्यूनतम दुई शिक्षक दरबन्दीको व्यवस्था गरिएको र विद्यार्थी नै नभएपछि यसै वडाको छिमेकी विद्यालय सीता माध्यमिक विद्यालय समायोजन गर्ने तयारी गर्न विद्यालयलाई आग्रह गरेको शिक्षा अधिकृत विकल काफ्लेले बताउनुभयो । शैक्षिकसत्र वैशाख २ गतेदेखि नै सुरु भएको विद्यालयमा शिक्षक, कर्मचारी दिनभर विद्यालय खोलेर बस्ने, कार्यालय समय सकिएपछि हाजिर गरेर घर जाने कार्यमात्र भएको छ । शिक्षक कर्मचारीलाई पनि विद्यार्थी नहुँदा दिनभर त्यत्तिकै खाली समय बिताउन कठिनाइ परेको शिक्षक शर्मिला रेग्मीले बताउनुभयो ।

विगतमा रामपुर नगरपालिकाको माथिल्लो भेग भएकाले यहाँ विशेषगरी जनजाति, दलित समुदायका बालबालिकाको बर्चस्व रहन्थ्यो । सिमित भवन र शिक्षक भए पनि विद्यालय विद्यार्थीले भरिभराउ हुन्थ्यो । पछिल्लो समय गाउँमा सडक र विजुली लगाएतका पूर्वाधार पुगे पनि शहरबजार आसपास क्षेत्रमा बसाइँसराइ जाने कार्यले गाउँका विद्यालयमा पछिल्लो समय विद्यार्थी संख्या अति न्यून छन् । चारैतिर घेराबार गरिएको करिब चार रोपनी क्षेत्रफलमा फैलिएको जनविकास प्रा.विमा तीन वटा भवनमा ११ वटा कक्षाकोठा रहेका छन् । भौतिक पूर्वाधार राम्रो रहेता पनि विद्यार्थी संख्या नै नभएपछि विद्यालय समायोजन गरिनुपर्ने स्थितिमा पुगेको हो ।

विसं २०२१ माघ १९ गते स्थापना भई पठनपाठन हुँदै आएको यस विद्यालय अहिले विद्यार्थी कोही पनि नभएपछि शिक्षणकार्य बन्द छ । गाउँमा जनघनत्व बाक्लै हँुदा धेरैलाई शिक्षा दिएको विद्यालय आज जनघनत्व कम हुँदै गर्दा विद्यालय बन्द हुने स्थिति आएको छ । यहाँको जनविकास प्राथमिक विद्यालयजस्तै अन्य ग्रामिण भेगका गाउँमा रहेका सामुदायिक विद्यालय बन्द हुने अवस्थामा पुगेको छ ।

 

यो खबर पढेर तपाईलाई कस्तो महसुस भयो ?