मधुकोटका आगोलागी पिडित परिवारलाई नेपाल मगर महिला संघ द्वारा राहत प्रदान

पाल्पा, रामपुर नगरपालिका–९ मधुकोट पाल्पाका आगोलागी पिडित परिवारको लागि नेपाल मगर महिला संघ केन्द्रिय समिति, नेपाल मगर संघ तथा नेपाल मगर महिला संघ जिल्ला कार्यसमिति पाल्पाले राहत प्रदान गरेको छ । गत बैशाख २६ गते भएको आगोलागी बाट घर नष्ट भएपछि पछि छिमेकी र नजिकैको विद्यालयमा आश्रय लिदै आएका ५ घर परिवारलाई राहत प्रदान गरेको हो ।

मंगलबार पिडित परिवारलाई भेटेर नेपाल मगर महिला संघ केन्द्रिय समिति, नेपाल मगर संघ तथा नेपाल मगर महिला संघ जिल्ला कार्यसमिति पाल्पाले राहत वितरण गरेको हो । त्रिपाल, भाँडा, लत्ताकपडा, खाद्यान्न र औषधी प्रदान गरेको थियो । नेपाल मगर महिला संघ केन्द्रिय समितिका अध्यक्ष हिरु राना मगरले विपत्त बाट पिडित बनेका परिवारलाई सान्त्वना प्रदानका लागि केन्द्रिय कार्यसमितिका पदाधिकारी सहित उपस्थित भएको बताउनुभयो । पिडित परिवारलाई सान्त्वना दिदै रानाले भन्नुभयो, “विपद् आईलाग्यो, नआत्तिनुहोला । स्वास्थ्यमा ख्याल गर्नुहोला । सुख, दुःखमा साथ हामी संगै विभिन्न संघ, संस्थाहरु छन् ।” रानाले गृहजिल्ला पाल्पाको खबर प्राप्त भए संगै वडा कार्यालय संग सहकार्य गरेर उपस्थित भएको बताउनुभयो । रानाले आगो निभाउने क्रममा घाईतेहरुको पनि शिघ्रस्वास्थ्य लाभको कामना गर्नुभयो ।

नेपाल मगर संघ पाल्पाका अध्यक्ष शान्ति झेंडी थापा मगरले पिडित परिवारको लागि आवश्यक थप सहयोगको लागि पनि पहल गर्ने बताउनुभयो । आगोलागी पिडित परिवारको पिडामा साथ दिन राहत सामाग्री सहित मगर महिला संघका केन्द्रिय पदाधिकारी, जिल्लाका पदाधिकारी, नेपाल मगर संघका प्रदेशका पदाधिकारी, जिल्ला कार्यसमितिका पदाधिकारी सरोकारवालाहरुको उपस्थितिमा मधुकोट पुगेको थियो । मगर महिला संघ केन्द्रिय कार्यसमितिले त्रिपाल, भाँडा, लत्ताकपडा, खाद्यान्न, सेनेटरी प्याड सहित प्राथमिक उपचारका सामाग्री बक्स रामपुर नगरपालिकाका वडा अध्यक्ष डिल बहादुर राना मार्फत हस्तान्तरण गरेको थियो । नेपाल मगर संघ, नेपाल मगर महिला संघ पाल्पाले खाद्यान्न तथा लत्तापकपडा नेपाल मगर संघ पाल्पाका अध्यक्ष शान्ति झेंडी र नेपाल मगर महिला संघ पाल्पाका अध्यक्ष थानी माया सोमै मार्फत हस्तान्तरण गरेको थियो ।

पिडित परिवारको लागि सहयोग गर्ने संघ संस्थालाई धन्यवाद दिदै रामपुर नगरपालिका–९ का वडा अध्यक्ष डिल बहादुर रानाले एक द्वार प्रणाली बाट रहत संकलन भैरहेको जानकारी दिनुभयो । आगोलागीले ५ परिवार बस्दै आएको दल बहादुर साठीघरे, ऐतुराम साठीघरे, खेम बहादुर साठीघरे र लोक बहादुर साठीघरेको घर जलेर नष्ट भएको थियो । जंगल बाट आएको आगो बस्तीमा पसेपछि घर संगै अन्न, लत्ताकपडा, नगद तथा गरगहना सहित ६८ लाख भन्दा बढीको क्षति भएको थियो । आगो बाट १ वटा बंगुर र ७ वटा बाख्राको पाठापाठी जलेको छ । आगो निभाउने क्रममा दल बहादुर साठीघरे र उहाँको बुहारी लक्ष्मी साठीघरे घाईते हुनु भएको थियो । घाईतेहरुको रामपुर अस्पतालमा उपचार भैरहेको छ ।

यो खबर पढेर तपाईलाई कस्तो महसुस भयो ?