स्याङ्जा, प्रहरीले स्याङ्जाको वालिङ बाट अवैध लागु औषध सहित दुई जनालाई पक्राउ गरेको छ । पक्राउ पर्नेमा पोखरा महानगरपालिका–१५ रामबजार कास्की बस्ने १७ वर्षिय शिव बस्नेत र विरूवा गाउँपालिका–२ अर्चले स्याङ्जा बस्ने २२ वर्षिय अजय राना रहेका छन् ।
शनिबार सिद्धार्थ राजमार्ग अन्तर्गत वालिङ नगरपालिका–१०, भकुण्डेमा वडा प्रहरी कार्यालय वालिङबाट खटिएको प्रहरीले सवारी साधनहरू चेकजांच गर्ने क्रममा बुटवल बाट पोखरा तर्फ आउँदै गरेको ग २ ख ५१५ नम्बरको बसमा सवार उनीहरुलाई प्रहरीले पक्राउ गरेको हो । उनीहरुको झोलाबाट डाईजेपाम– ५० एम्पुल, फेनारागन ५० एम्पुल र नोफिन ५० एम्पुल जम्मा १५० एम्पुल लागुऔषध बरामद गरेको जिल्ला प्रहरी कार्यालय स्याङ्जाका प्रवक्ता प्रहरी निरीक्षक पावल सिंह लामाले जानकारी दिनुभयो । यस विषयमा थप अनुसन्धान भैरहेको प्रहरीले जनाएको छ ।
