पाल्पा, रामपुर नगरपालिका–५, मटेरीमा ‘रामपुर फनपार्क विविध सांस्कृतिक कार्यक्रम’ सम्पन्न भएको छ । आईकोनिक ग्रुप प्रालि द्धारा सञ्चालित रामपुर फनपार्कमा चार दिने कार्यक्रम भव्यताका साथ सम्पन्न भएको हो ।
मनोरञ्जन संगै आन्तरिक पर्यटन प्रबद्र्धनका लागि भएको कार्यक्रममा हजारौंको संख्यामा दर्शकहरुको उपस्थिति रहेको थियो । कार्यक्रम गत फागुन २५ गते देखि सुरु भएको कार्यक्रम सोमबार सम्म भएको थियो । चार दिनको अवधिमा झण्डै २० हजार बढी दर्शकहरुले कार्यक्रमको अवलोकन गरेको आईकोनिक ग्रुप प्रा.लि.का अध्यक्ष भोजेन्द्र प्रकाश ढकालले जानकारी दिनुभयो । मनोरञ्जन, आन्तरिक पर्यटन प्रवद्र्धन तथा स्थानीय प्रतिभाको प्रस्फुटनका लागि आयोजना गरिएको कार्यक्रममा लोपन्मुख मौलिक कला र संस्कृतिलाई पनि स्थान दिईएको उहाँले जानकारी दिनुभयो । जस अन्तर्गत कार्यक्रममा रामपुर २ को कृष्णचरित्र नाच प्रदर्शक समेत गरिएको थियो । कार्यक्रमको अवसरमा एक सय वर्ष पार गर्नु भएको जेष्ठ नागरिक फुलमाया पोखरेललाई सम्मान गरिएको थियो ।
कार्यक्रममा कलाकारहरु मोहन खड्का, प्रिति आले, समिक्षा अधिकारी, पुस्कल शर्मा र कृष्ण सुवेदी लगाएतको प्रस्तुति रहेको थियो । कलाकाहरुको प्रस्तुतिमा दर्शकहरु झुमेका थिए । बालउद्यानमा रमाउनेहरुको संख्या पनि बाक्लो रहेको थियो । कार्यक्रम प्रस्तोताको रुपमा कृष्ण सुवेदी रहनु भएको थियो ।
