पाल्पा, जिल्लाको रैनादेवी छहरा गाउँपालिका-७ बाट बुधबार पनि प्रहरीले भरुवा बन्दुक बरामद गरेको छ । जंगलमा लुकाई राखेको अवस्थामा बेबारिसे अवस्थामा पाँच थान भरुवा बन्दुक बरामद गरेको हो ।
अस्थाई प्रहरी पोष्ट बेलबासबाट गस्तीमा खटिएको टोलीले गस्ती गर्दै जाने क्रममा विहान जिल्ला पाल्पा रैनादेवी छहरा- ७, ढावा स्थितमा रहेको भोर्लेघाट सामुदायिक जंगल बाट एक नाले भरुवा बन्दुक दुई थान र छर्रा र बारुद सहितको झोला थान-१ फेला पारेको थियो । सोही टोलीले दिउँसो रैनादेवी छहरा-७ ढावानाके स्थित चन्द्राकार सामुदायिक वनमा ढुङ्गा मुनि लुकाई छिपाई राखेको अवस्थामा एक नाले भरुवा बन्दुक तीन थान सहित छर्रा र बारुद बेवारीसे अवस्थामा बरामद गरेको जिल्ला प्रहरी कार्यालय पाल्पाका प्रहरी नायव उपरीक्षक सुगन्ध श्रेष्ठले जानकारी दिनुभयो ।
बरामद भएको बन्दुक, छर्रा र बारुद जिल्ला प्रहरी कार्यालय पाल्पामा ल्याई आवश्यक अनुसन्धान कार्य भईरहेको प्रहरीले जनाएको छ । प्रहरीले सोमबार पनि रैनादेवी छहरा-७ बाट १ थान भरुवा बन्दुक सहित चार जनालाई नियन्त्रणमा लिएको थियो । त्यस्तै गत चैत ८ गते रैनादेवी छहरा-४ बाट १ थान भरुवा बन्दुक सहित एक जनालाई नियन्त्रणमा लिएको थियो ।
