पाल्पा, पाल्पाकोे निस्दी गाउँपालिका – ३ झिरुवासको क्याङ्गरुङ्गमा भिर बाट लडेर एक पुरुषको मृत्यु भएको छ । रामपुर नगरपालिका–४, हातेमालो चोक, पाल्पा बस्ने ५९ वर्षीय नर बहादुर सोतीको मृत्यु भएको हो ।
आफन्तको शुद्ध शान्तिमा गएर घर फर्किने क्रममा निस्दी–३ क्याङ्गरुङ्ग स्थित क्वादी जंगलको भिर बाट खसेर सोतीको मृत्यु भएको इलाका प्रहरी कार्यालय रामपुरका प्रहरी निरीक्षक शालिकराम खनालले जानकारी दिनुभयो । गत बुधबार क्याङरुङ्ग खलाबारी गाउँमा आफन्तको शुद्ध शान्तिमा जानुभएका सोती घर नफर्किए पछि आफन्तले खोजी कार्य सुरु गरेका थिए ।
खोजी गर्दै जाँदा आज दिउँसो आफन्तले भिर भन्दा तल रहेको कुन्दर खोलामा सोतीको शव फेला पारेका थिए । सोतीको शव भिर देखि ३५ तल कुन्दर खोलामा फेला परेको थियो । शव पोष्ट मार्टमका लागि रामपुर अस्पताल ल्याइएको छ । घटनाको विषयमा थप अनुसन्धान भैरहेको प्रहरीले जनाएको छ ।
