पाल्पा, पाल्पाको निस्दी गाउँपालिकाले १२ कक्षा उत्तिर्ण गरी २० वर्ष पुरा भएर विवाह गरेका तथा स्नातकोत्तर तह उत्तिर्ण गरेका महिलाहरुलाई सम्मान गरेको छ । छैठौं राष्ट्रिय महिला अधिकार दिवसको अवसर कार्यक्रम गरी उनीहरु संगै उत्कृष्ट महिला उद्यमीलाई पनि सम्मान गरेको हो ।
‘हाम्रो अभियान आत्मनिर्भर छोरीको सम्मान’ भन्ने नाराका साथ भएको कार्यक्रममा गाउँपालिका भित्रका कक्षा १२ पास गरी २० वर्ष पुगेर मात्र विहे गरेका २२ जना, स्नातकोत्तर तह उत्तिर्ण ३ जना र उत्कृट उद्यमी ५ जना महिलाहरुलाई सम्मान गरिएको हो ।
महिलाहरुलाई जिल्ला समन्वय समिति पाल्पाका उपप्रमुख काशिका गैरे, गाउँपालिका उपाध्यक्ष तीरण कुमारी श्रेष्ठ र प्रमुख प्रशासकिय अधिकृत मदन अर्यालले खादा ओढाएर नगद र सम्मान पत्र सहित सम्मान गर्नु भएको हो । महिलाहरुलाई सम्मान गर्दै जिल्ला समन्वय समितिका प्रमुख काशिका गैरेले महिलाहरुलाई शैक्षिक र आर्थिक रुपमा सशक्त बनाउन कार्यक्रमले महत्वपूर्ण सहयोग गर्ने बताउनुभयो ।
गाउँपालिका उपाध्यक्ष तीरन कुमारी श्रेष्ठले बालविवाह न्यूनिकरणका लागि सचेतना जगाउनुका साथै महिलाहरुलाई शिक्षा र उद्यम तर्फ आकर्षित गर्न गत वर्ष देखि कार्यक्रम सञ्चालन गरिदै आएको जानकारी दिनुभयो । उहाँले महिलाहरुलाई शिक्षा र उद्यमशिलताको माध्यम बाट अघि बढाउन पालिकाले प्रयास गर्दै आएको बताउनुभयो । प्रमुख प्रशासकिय अधिकृत मदन अर्यालले बालमैत्री स्थानीय शासन लागु गर्न पालिकामा अभियान सञ्चालन भैरहेको सन्दर्भमा बालविवाह न्यूनिकरण संगै महिला सशक्तिकरणमा जागरुक बनाउन सम्मानका कार्यक्रम गरिएको बताउनुभयो ।
कार्यक्रममा निस्दी गाउँपालिका ३ का वडाध्यक्ष नविन्द्र थापा सोती, कार्यपालिका खुमीसरा पुलामी र बालकल्याण अधिकारी कुश्माखर पाण्डेले आफ्नो धारणा राख्नु भएको थियो । कार्यक्रममा महिला अधिकारकर्मी मिना जिसीले महिला सशक्तिकरण, घरेलु तथा लैङ्गिक हिंसा न्यूनिकरणका उपाय, हिसा विरुद्धको कानुनी व्यवस्था लगाएतका विषयमा प्रशिक्षण दिनु भएको थियो । साथै कार्यक्रममा गौरी शंकर माध्यमिक विद्यालयका विद्यार्थीहरुले बालविवाह विरुद्धको सचेतना सम्बन्धी नाटक सहितका प्रस्तुति राखेका थिए ।
गाउँपालिकाले गत जेठ ४ देखि ११ गते सम्म ७ वटै वडामा सूचना जारी गरी वडाको सिफासिरको आधारमा महिलाहरुलाई सम्मान गरेको हो । निस्दी गाउँपालिकाका महिला बालबालिका तथा जेष्ठ नागरिक शाखाका प्रमुख बन्दना गुप्ताले १२ कक्षा पास गरी २० वर्ष पुरा भएर विहे गर्ने महिलालाई नगद १० हजार, स्नातकोत्तर उत्तिर्ण महिला र उत्कृष्ट उद्यमी महिलालाई ५/५ हजार सहित सम्मान गरिएको जानकारी दिनुभयो । गाउँपालिकाको बहुउद्देश्य सभाहलमा भएको कार्यक्रम महिला समन्वय समितिका अध्यक्ष तिर्सना खन्गाहाको अध्यक्षता, गाउँपालिकाका प्रवक्ता एवं वडा नं. ६ का अध्यक्ष मेख बहादुर सुनारीको स्वागत र महिला बालबालिका तथा जेष्ठ नागरिक शाखाका प्रमुख बन्दना गुप्ताले गर्नु भएको थियो ।
गाउँपालिकाले गत वर्ष अन्तर्राष्ट्रिय नारी दिवसको अवसरमा स्नातकोत्तर तह उत्तिर्ण १० जना र कक्षा १२ उत्तीर्ण गरी २० वर्ष उमेर पुगेर विवाह गर्ने २५ जना महिलाहरुलाई सम्मान गरेको थियो ।
