माघ १० ।
पाल्पा, स्याङ्जाको पुतलीबजार नगरपालिका वडा नं.–१४ लामागेमा फेला परेको बम नेपाली सेनाको टोलीले डिस्पोज गरेको छ । बुधबार विहान स्थानीय विष्णु प्रसाद पौडेलको खेतमा भेटिएको बम श्री सिंह सारदुल गुल्म आँधिखोला ब्यारेक बाट गएको सेनाको टोलीले डिस्पोज गरेको हो ।
खेतमा जे.सि.वि.ले सम्याउने क्रममा खेतको सतहबाट करिब १ हात तल तार जडित फलामको बोत्तल जस्तो देखिने शंकास्पद बस्तु फेला परेको थियो । उक्त शंकास्पद वस्तु नेपाली सेनाले डिस्पोज गरेको हो । फेला परेको वस्तु टुईचमोटरमा लाग्ने एचई बम रहेको र बम सुरक्षित तवरले डिस्पोज गर्न सफल भएको जिल्ला प्रहरी कार्यालय स्याङ्जाका निमित्त कार्यालय प्रमुख प्रहरी नायव उपरीक्षक हरि प्रसाद पौडेलले जानकारी दिनुभयो ।
स्थानीयका अनुसार बम डिस्पोज हुँदा ठूलो आवाज आएको थियो । बम डिस्पोजल टोली घटनास्थल नपुग्दासम्म नेपाल प्रहरी र आँधीखोला ब्यारेक स्याङ्जाले सुरक्षा दिएको थियो ।
