पाल्पा, दक्षिण कोरियामा सम्पन्न १५ औँ कोरिया ओपन कराते प्रतियोगितामा स्वर्ण जित्न सफल खेलाडीलाई रामपुर नगरपालिकाले नगद १ लाख सहित सम्मान गरेको छ । गत जुलाइ १ देखि २ सम्म भएको प्रतियोगितामा पुरुष तर्फको ६० केजीमुनि स्वर्ण पदक जित्न सफल रामपुर नगरपालिका १ का यम बहादुर समाललाई नगरपालिकाले सम्मान गरेको हो ।
ठूलोबेशी घर भएका समाललाई रामपुर नगरपालिकाले नगर सभा तथा १३ औं अधिबेशनको अवसरमा नगद १ लाख सहित दोसला ओढाई सम्मान पत्र सहित सम्मान गरेको हो । रामपुर नगरपालिका प्रमुख रमण बहादुर थापा, उपप्रमुख बालकुमारी थापा र प्रमुख प्रशासकिय अधिकृत लेखनाथ न्यौपानेले उहाँलाई सम्मान गर्नु भएको थियो । यसै अवसरमा नगरपालिकाले कर्मचारी तथा विभिन्न व्यक्तिहरुलाई सम्मान गरेको छ ।
रामपुर नगरपालिका कृषि शाखामा रहि लामोे समय सेवा गर्नु भएका कृषि शाखा अधिकृत रामहरी पाण्डे, लेखा प्रमुख सीता न्यौपाने, इलाका प्रहरी कार्यालयका प्रहरी निरिक्षक लक्ष्मण देवकोटा र रामपुर १० का अगुवा कृषक जनार्दन पन्तलाई योगदानको आधारमा सम्मान गरेको हो । उहाँहरुलाई दोसला ओढाई सम्मान पत्र र पाल्पाली करुवाले सम्मान गरिएको थियो ।
