काठमाडौं, पूर्वी नवलपरासीमा पनि विहिबार एक जनामा कोरोना संक्रमण भएको पुष्टि भएको छ । देवचुली नगरपालिका वडा नम्बर १२ का ४९ वर्षीय पुरुषमा संक्रमण पुष्टि भएको स्वास्थ्य मन्त्रालयका सहप्रवक्ता डाक्टर समिरकुमार अधिकारीले जानकारी दिनु भएको छ ।
यस संगै कोरोना संक्रमितको संख्या २ सय ४६ पुगेको छ । भारतबाट आएका पुरुषको चितवनको भरतपुर कोभिड–१९ प्रयोगशालामा स्वाब परीक्षण गर्दा कोरोना संक्रमण देखिएको हो । संक्रमित व्यक्ति भारतको कोलकाता बाट वैशाख २५ गते हिडेर ३० गते चितवनको भरतपुर आइपुगेका थिए । ३० गते राति ११ बजे उनलाई सोझै भरतपुर कोरोना अस्पतालमा लगिएको हो । उनको स्वास्थ्य अवस्था सामान्य रहेको र अहिले स्वास्थ्यकर्मीको निगरानीमा रहेको सहप्रवक्ता अधिकारीले जानकारी दिनुभयो ।
बिहीबार विहान पनि २ जनामा कोरोना भाइरस (कोभिड–१९) पुष्टि भएको थियो । मन्त्रालयका अनुसार काठमाडौं, चन्द्रागिरी निवासी ३२ वर्षीय पुरुष र कपिलवस्तु निवासी ६ वर्षीया बालिकालाई संक्रमण देखिएको हो । घाँटी दुख्ने समस्याले सताएपछि त्रिवि शिक्षण अस्पतालमा भर्ना भएकी ६ वर्षीय बालिकामा कोरोना संक्रमण भेटिएको हो । बालिकाको राष्ट्रिय जनस्वास्थ्य प्रयोगशाला, काठमाडौंमा परीक्षण गरिएको थियो। बालिकालाई अहिले शिक्षण अस्पतालको आइसोलेसनमा राखिएको छ। उनलाई संक्रमण देखिएसँगै उपचारमा संलग्न चिकित्सक क्वारेन्टाइनमा बसेका छन्।